做馬時亨嘉賓︱林子祥疫下開騷未決定延期：計劃唔到！

歌手林子祥（阿Lam）今日（28日）接受馬時亨主持的《名人堂》節目任嘉賓，阿Lam原定3月尾在亞博舉行個人演唱會，對於近日疫情嚴峻，防疫措施收緊，問到演唱會會否延期？他帶點無奈地說：「唔知行乜路，日日唔同，暫時未決定延期，再睇吓疫情點，因為冇得計劃，（若演唱會延期，會影響你之後的工作？）依家去邊都麻煩，最好喺屋企安全又舒服，唔去多人地方。（幾時再返大陸？）未傾，之前去咗大陸4個月，內地疫情好似冇咁犀利。」馬時亨為安全起見，訪問前專登做了核酸檢查，之前都唔見人，晚晚留在家食飯，以保障雙方。阿Lam亦和應，新年都只會留在家，不會出外拜年，待兒子回家見面相聚。

阿Lam透露6年前亦上過對方主持的《望子成才》節目，當時講教育和兒子，今日主要談音樂和打Golf，馬時亨爆Lam是高球高手，之前大家一齊打波，自己就成日都輸，阿Lam表示不會賭波，只打牙骹。馬時亨透露節目只請名人老友做嘉賓，問為何不請表弟曾志偉上節目？馬時亨稱志偉是自己人，上次做節目都訪問過志偉，他現時為無綫高層，故都在邀請名單之列。