陶大宇加持!薛家燕與《愛.回家》唱好新年

20220128
東網電視
更多新聞短片
藝人陶大宇翻唱《倒轉地球》紅遍內地和香港,其獨特唱腔及自創水撥手勢,令人印象難忘!無綫近日特別找人把該曲重新填上賀年詞,改成賀年歌《今年好笑口》,並邀得笑口常開的薛家燕,率領林淑敏、許家傑、鄭世豪、譚嘉儀、鄭俊弘、滕麗名、呂慧儀、戴祖儀等大堆頭藝人參與。日前,家燕拉大隊到沙田拍MV,還邀得麥秋成排舞,家燕表示:「大家都知呢排大宇嘅《倒轉地球》好hit,我哋唱呢首歌因為個節奏好輕快、開心,歌詞全部都係講恭賀新禧,疫情之下都希望大家開開心心。今次拍MV有十幾個藝人參與,同我一組係《愛.回家之開心速遞》嘅林淑敏、許家傑同鄭世豪,第一次合作大家幾合拍,幾個鐘頭就拍晒。」
對於今次重返舊地拍MV,家燕坦言滿滿回憶:「50年前我喺呢度拍電影,見到佢哋啲牆貼住我當時拍電影啲相,嗰時得十幾歲,我同曾江、胡楓喺呢度拍咗唔少青春電影、歌舞片,拍完都係留喺嗰度食乳鴿,嗰時都好多人嚟食嘢同影相,當一個影星嘅追蹤點,今次嚟到,老闆娘特別嚟招呼我哋,整咗佢哋最出名嘅燒乳鴿,又煲粥畀我哋,仲特別攞咗瑞士好靚嘅植物畀我返屋企種,好似香薰咁,又可以做肥皂,好有心。」而林淑敏則笑指一直渴望與家燕同台唱歌,沒想過今次願望成真:「希望疫情快啲過去,大家可以一齊再熱熱鬧鬧、開開心心。」許家傑就表示:「最緊要身體健康!希望可以同家燕一齊跳十字步!」