Dry足3年︱洪卓立疑爆新戀情　撻着《膠戰》Hillary

34歲的洪卓立與湯怡拍拖11年，兩人於2018年11月宣布分手，去年湯怡與排舞師麥秋成奉女成婚，家庭美滿。但洪卓立未聞有新戀情，一直享受單身生活，不過Dry足3年後，最近佢突然於社交網的限時動態上載一張女仔攬狗相，疑似男友視角，但又好快就刪除，不過點都唔夠網民cap圖快手，有網友認出相中人有份演出ViuTV《膠戰》的Hillary（劉沛蘅），網友紛紛討論指，「膠戰Hillary同洪卓立拍緊拖？」

30歲的Hillary在《膠戰》6膠中被封為「索膠」、顏值相當高，未入行前做模特兒，入行後有「翻版薛凱琪」之稱，在昨晚（30日）《膠戰S2》播出的最後一集中，就爆出Hillary是當中戀愛經驗最豐富的一位。玩遊戲期間，要考驗6位膠人的合拍性，其中一個問題是：「邊位戀愛經驗最豐富？」除了「煨Sir」Jeffrey，其他全部寫Hillary（劉沛蘅），並爆出Hillary「前度與阿正撞樣」，阿正仲補充：「識跳舞，明星嚟嘅」！

洪卓立回應東網稱：「大家係好朋友，當日同幾個朋友一齊食飯。因為見佢隻狗好得意識笑，所以影相。本身諗住喺close friend share，點知有朋友講先知post錯咗public。」而Hillary都回應東網，說：「我同佢係好朋友，嗰日幾個朋友喺我屋企食家常便飯，佢見我隻狗得意就影咗張相，我事後先知原來佢唔小心public咗張相。」兩人回應差唔多一樣，疑似夾定口供。