孖男友創糕點品牌　林希靈行花市專攻郭富城門簾

藝人林希靈和黃劍文接受香港開電視訪問，兩人即場比併煎年糕。希靈更帶了她和男友陳安立創立的自家品牌賀年糕點，她透露創立糕點品牌是因為家人：「婆婆做糕好好吃，每逢新年都會做畀我哋，但佢愈來愈老，我諗如果我要做食物嘅生意，不如做糕。（點解同男友一齊做？）一開始係我做，當然要拉埋身邊嘅親朋好友，所以就拉埋男友。我哋分工好好，我幻想乜都想做，佢就比較腳踏實地，係把關者。」

談到新年習俗，劍文說每年都會去拜年：「初一二到婆婆家，然後去姨媽、舅舅、阿姨家，多數打麻雀，我哋呢班後輩就玩魚蝦蟹，新年玩一兩元，平時唔賭錢。大家喊雞、喊魚，好嘈。以前都會去行花市買水仙花，一開花就聞到新年嘅味道咁。」希靈就分享五、六歲時逛花市的戰利品：「四大天王的門簾，寫住恭喜發財。我揀咗郭富城，哥哥揀張學友。」