初一見紅入院︱柯震東自爆受傷原因險絕子絕孫

台灣男星柯震東喺本月2日（大年初二）於社交網貼出傷勢照，透露人在醫院排急症，手跟腳都有傷，佢晒出嘅照片見佢紮上了繃帶，仲寫道：「初一愉快，見紅財來！」大年初一喺醫院度過真係大吉利是，不過當時佢未有說明受傷的原因，令到粉絲好擔心。

兩天後柯震東終於喺今日（4日）初四凌晨開直播，講番受傷原因，佢先係同大家拜年，之後解釋當時好多媒體問佢，但之所以唔想答，係因為「太丟臉了」。

柯震東透露受傷係因為「勸交遭受波及」，佢所養嘅兩隻愛犬突然打起來，所以佢連忙過去勸阻，電光火石之間大髀被佢哋咬出4個洞，又因為拉扯，腿部仲出現撕裂傷，好彩就醫後冇大礙。柯震東透露兩隻愛犬係大型犬，平常有刻意將佢哋分開避免為了爭地盤而發生衝突，當天係意外，佢都相信狗狗唔係故意要咬佢，所以不會責備，事後愛犬們也是照常開心開餐，柯震東仲爆料話，當時愛犬們咬佢嘅位置敏感：「再咬到一點點我就絕子絕孫」。今次柯震東好彩保得住「小小東」，不過就令人諗起佢舊愛蕭亞軒早前都被狗咬傷，不過蕭亞軒就冇咁好彩，差啲毀容，過咗好長時間先康復。