被七仙羽狠批惹是非！黃榕擘髀跣低化解一劫

藝人黃榕早前獲堪輿學家七仙羽（七師傅）邀請上ViuTV節目《七福星》做嘉賓，昨晚（3日）播出一集講十二生肖，肖雞的黃榕被七師傅批她今年較多是非，易畀朋友跣，節目中七師傅坐在效野公園的涼亭講解雞年運程，穿紅噹噹旗袍的黃榕隨即擘腿跣落地，跣低動作誇張，效果搞笑。黃榕說：「講我個生肖今年成日畀人跣，師傅幫我諗妙計化解，幾搞笑，本來仲有一場係師傅幫我喺背脊畫符就會百毒不犯，不過呢幕無出到街。」

原來擘腿跣低是黃榕自己構思，再向劇組提議，她說：「我同劇組講我可以跣出一字腿，佢哋話好，因為唔止跣一次，係跣咗好多次，膝頭跌到損晒。」她表示第一次上此節目感覺好玩，並多謝七師傅帶挈，對被批今年易招惹是非，她表示會慎言。