COLLAR感情狀況大公開！原來有2位成員名花有主

ViuTV新女團COLLAR人氣爆燈，更係唔少男士們嘅「理想女友」，不過其實8位成員入面，有2位已經名花有主，仲不時高調晒愛！其中被笑稱撞樣三面怪人「達達」嘅WINKA（陳泳伽）同從事金融行業嘅男友已經拍拖6年，男友不但成熟穩重，更非常支持佢從事幕前，曾粉墨登場亮相其影片頻道撐場，參加《全民造星IV》時又會管接管送，甚至出道後做埋COLLAR忠實粉絲，出心又出力！

另外，So Ching則與舞蹈員男友李啟言（阿Mo）愛得癡纏開展同居生活，其實阿Mo係So Ching嘅「師兄」，事關佢曾參加首屆《全民造星》，現時更係組合MIRROR嘅御用Dancer，經常拍住姜濤、Anson Lo等人拍MV、出Show等，而喺So Ching參加比賽時，阿Mo幫忙編舞之餘，總決賽時更上台伴舞，私底下亦會分擔家務，成為So Ching最強大嘅後盾。