佟麗婭被爆第二春　「新歡」竟然係何潤東

內地「新疆四美」之一佟麗婭同結婚7年嘅內地導演陳思誠離婚後，傳同大佢16歲嘅內地高官再婚，呢單緋聞激到佢要報警，以為佢嘅感情生活又再平靜啦，點知轉頭又被網民影到佢同一位型男食平民餐，唔通呢位先係佢新歡？

網民影嗰張相中，着咗白色羽絨嘅佢，同一位戴黑帽、黑衫嘅高大男排排坐喺一間平民食肆度，佢哋似乎傾得好開心，全程有講有笑，佢嗰位「新歡」仲自斟自飲，現場氣氛好融洽，睇得出佢哋好熟。不過睇真啲，嗰個型男原來係已婚嘅何潤東，而且見佢哋成枱餸，何潤東身邊仲出現咗一對手，所以佢哋唔係撐腳枱，似同朋友聚餐多啲。

其實佢哋兩個搞飯局已經唔係第一次，之前佢被拍到同一位短髮男一齊行，仲同個男人傾到交頭接耳，又被傳佢可能有新男友，點知佢自己甫相玩自爆，相中嘅男人又係何潤東。至於佢哋點解咁熟，全因佢哋合作過《無懈可擊之美女如雲》及《浣溪沙》等劇，由拍檔變成朋友，佟麗婭啲粉絲想見到女神有第二春，似乎要畀啲耐性再等待吓啦。