加盟華納做林峯師妹！蘇麗珊「變髮」殺入樂壇

「文青女神」蘇麗珊出道時短髮形象深入民心，至近年轉新Look留長髮，踏入新一年，佢再次變回超短髮，唔單止係為新劇做準備，原來更係重新出發，以新人身份殺入樂壇，加盟華納唱片做林峯師妹！佢拍片分享剪髮過程，仲開心宣布好消息：「新一年剪返短頭髮了，終於有套劇要我剪頭髮，而且有了新的方向！我加入了華納唱片的大家庭了，音樂對我來說是一種很特別跟很秘密嘅語言，希望很快很快跟大家分享好嗎？」雖然未有正式嘅音樂作品面世，但其實佢昨日（14日）情人節就拍片獻唱由自己作曲填詞嘅《Kenny》，送畀圈外男友Kenny，放閃同時大晒音樂才華。

對於加盟新公司，佢指公司內有好多富有才華嘅音樂人，期待日後同佢哋合作嘅火花。佢亦已經同公司開始商議今年的造歌大計，直言：「希望年中會有作品見到大家，自己都有作歌，希望大家聽完我嘅歌會有條路都唔係咁難行啫或者忘憂治癒嘅感覺。」並預告新一年會努力寫歌及錄音。