回到未紅時！唐嫣18年前舊照出土　高額襯旗袍走樣

內地女星唐嫣依家貴為當紅花旦，舉手投足都受萬人景仰，依家仲要同老公羅晉婚姻美滿，羨煞旁人。不過近日佢昔日出道時嘅舊照就忽然再次「出土」，事關喺2004年時，尚在就讀Year 2嘅唐嫣就被名導張藝謀選中，成為「奧運寶貝」，遠赴希臘雅典為第28屆奧運會閉幕式表演，之後佢就一舉成名，回國後正式出道。

今次輯相重見天日，就見到清澀可人嘅唐嫣比依家瘦咗幾個碼，不過佢對招牌大眼就仲喺度，當中佢就有着上隊服及旗袍嘅造型，又同「伯樂」張藝謀合照，少女味滲晒出嚟。不過網友嘅焦點，就統一放晒落去佢個旗袍Look度，佢為配合造型而Gel起劉海，點知就令佢個「清裝高額」凸晒出嚟，髮線明顯偏後，雖然冇損靚樣，但同佢依家嘅高貴氣質好唔同，網友仲嫌佢當時太瘦，四肢過分纖幼，話佢都係依家個Look好睇好多。