走蔭+小背心　炎明熹轉Look超模上身

《聲夢傳奇》三料冠軍炎明熹（Gigi）唱功好就係人都知，但其實佢好有潛質行天橋做模特兒。日前佢喺社交網甫咗新相，相中化咗裸妝嘅佢，嗰對鳳眼炯炯有神，電到人都暈，又畫韓式粗眉加添英氣，而最令人驚喜係齊蔭長黑直髮係icon嘅佢，束起條辮兼撥開咗啲齊蔭，露出佢嗰飽滿額頭，唔使靠p圖都變成另一個人咁，瞬間大過咗好多，稚氣冇晒，只有潮、型、靚，成個超模咁款喎。加上佢又着咗件背面有交差帶嘅貼身小背心，本身偏瘦嘅佢，原來側面睇，身材好有曲線，都係屬有料到之人喎。

佢呢輯好似城市驚喜嘅相，好多網民都大讚，連佢嗰班《聲夢》friend都排住隊嚟話靚，好似文凱婷就「O」晒嘴：「Oh My God…天生明星相。」既然咁多人鍾意呢個新look，Gigi不妨考慮自拆「招牌」，走蔭見人啦。