新造型又再出事！COLLAR疑向師兄MIRROR「致敬」

ViuTV新女團COLLAR人氣高企，近日天氣持續寒冷，COLLAR就趁機推出新一輯造型照，以一身暖笠笠嘅新Look向粉絲送暖。相中見佢哋齊齊着上超厚毛毛外套，加上眾女攬作一團打成一片，又互相咬頭髮等，場面搞笑，隔住個Mon都Feel佢哋啲暖意。不過佢哋7彩顏色嘅配搭，再拼埋身後簡單灰色嘅背景，整個概念即令網民聯想起師兄MIRROR歌曲《12》嘅造型，疑有「致敬」之嫌。其實COLLAR嘅造型唔係第1次出事，曾被指與韓國組合NCT、男團EXO及日本動漫《JoJo的奇妙冒險》等相似，今次再惹「參考」MIRROR疑雲。

另外，COLLAR隊長Gao亦於社交網分享團員相處日常，其中見Ivy So（蘇雅琳）化身飼養員，餵「寵物」Day（許軼）及Candy（王家晴）進食，惟Candy食得太污糟令紫菜散落一地，即被Ivy So嫌棄：「都唔可愛嘅。」至於紮上雙辮嘅Day，就露出超可愛表情，即時獲Ivy So及Candy大讚得意，Candy仲忍唔住狂錫Day嘅包包面，但就因為食完未抹嘴，即被Day投訴：「你個嘴好油呀！」相當搞笑。