限娘令未驚過！華晨宇濃妝金髮晒鮮花紋身

國家廣電總局去年8月發布新規令，杜絕「娘炮」等畸形審美，外界稱為「限娘令」，圈中一眾花美男嚇到「花容失色」，好似被點名嘅流量明星鹿晗、蔡徐坤等，唔係長髮剪短，就係忽然晒肌肉，務求令自己陽氣有咁濃得咁濃。不過已為人父嘅實力歌手華晨宇，佢尋日（22日）就忽然晒出一系列自拍，大騷全新造型，只見佢將頭髮染金兼留長，即使加上Filter都仍然清晰見到佢濃濃嘅眼妝，遠睇仲以為係邊位美女自拍。

加上佢着上一件鬆身浴袍咁嘅上衫，有意無意晒出胸前、耳後根嘅玫瑰花同左手臂上嘅招牌「花花」紋身，引嚟網友炮轟其行徑叛逆，更加有人直接話佢「太娘」、「節目上化妝比女的都濃」，不過同時佢呢個Post一轉眼就已經有過一百萬嘅轉發量，真係露少少都搶到收視，夠晒厲害。