菊梓喬撇甩緋聞男友陪妹妹唱經典情歌

「星夢一姐」菊梓喬（Hana）雖然最近多咗位緋聞男友吳卓羲，但佢絕對冇掛住拍拖而變得「有異性冇親情。日前佢就同進軍KOL界，網名「三樓百胃Stomachguchi」嘅妹妹去唱遊，享受大自然嘅陽光同空氣，見環境咁優美，佢心情靚到唱咗林子祥嘅經典歌《分分鐘需要你》畀妹妺聽添。

「三樓百胃Stomachguchi」見家姐幾年冇拖拍，但難得識咗個型男朋友，都依然會「帶你到天空去，在太空中兩人住…」，咁姊妹情深梗係好開心啦，所以情難自禁咁攬住Hana，以行動證明有幾咁多謝家姐。

不過笑到瞇埋眼嘅妹妹，唔知係咪箝得Hana太耐又太實，佢家姐本來笑得好冧、好開心，但個表情同甫士突然有啲怪，可能因為妹妹由同佢頭貼頭，點知愈攬愈落，最後阿妹個頭滑咗落佢個胸度，搞到佢好似用個胸頂住個阿妹個頭，睇佢個樣就好似心諗梗：「夠啦阿妹，你放手啦，家姐就快畀你推落橋跌埋去啦。」