王祖藍帶隊多嘢拍　王浩信高海寧攻綜藝晒唱功

去年上任無綫首席創意官嘅王祖藍，近月就帶隊北上開拓新方向，佢連同視帝王浩信、高海寧（高Ling）及張振朗北上交流，眾人為內地綜藝節目《開拍！情景劇》積極備戰，同時亦參與湖南衛視王牌綜藝節目《你好星期六》嘅拍攝，估唔到節目本周六（26日）就會正式播出，依家大家只可以睇住預告片「止渴」。

片段中見到王祖藍Lead住3人大開金口獻唱廣東歌，又同嘉賓大玩「大電視」遊戲，嗌一班操普通話嘅內地藝人用唔鹹唔淡廣東話交流，當中就見到張振朗同位女嘉賓玩到大家都一頭霧水，反而就喺預告片入面得到最多單人鏡頭。