同小豬分手2年！周揚青孖型男影親密照：笑得最多一次

內地網紅周揚青自從踢爆前度台灣舞王羅志祥（小豬）荒淫史後，憑住率直個性，深受內地綜藝界歡迎，不知不覺佢哋分手已逾2年，小豬已逐漸復出，而周揚青不時喺社交網分享生活點滴，回復單身嘅佢呢2年嚟都仲未搵到穩定嘅另一半，佢近日突然喺社交網晒出大量同型男影嘅親密照，睇到佢好冧咁躺入對方嘅懷中，面上露出開心嘅笑容，今日（25日）晒出一段花絮短片，好Sweet咁話：「給你們看段粉紅泡泡視頻。」

唔少網民睇見都覺得好驚喜，仲認出男方身份係內地網紅，大讚佢哋好襯，紛紛留言問佢哋係咪公開戀情：「這是公開了嗎？」但係周揚青話佢哋只係拍擋，一齊為品牌影宣傳照咋，絕對唔係拍拖，不過佢話呢次合作好開心，係佢近嚟笑得最多嘅一次添！