林凱恩咀「蔥頭」激嬲粉絲　實情同周嘉洛或有彎轉

處境劇《愛‧回家之開心速遞》「金城安」周嘉洛與「Bonnie」林凱恩嘅CP大受歡迎，早前劇中2人分手，即令網民「暴動」，惟劇情之後又講到雙方未忘情，似乎有彎轉，唔少粉絲都希望佢哋復合，不過新一集又再扭轉，周嘉洛始終放唔低「被分手」，結果林凱恩決定搵「蔥頭」丘梓謙幫手扮情侶借位錫錫等周嘉洛死心，豈料當時發生小意外林凱恩不慎仆親，假戲真做同丘梓謙咀嘴，最後周嘉洛死心祝福2人，而片尾亦暗示丘梓謙對林凱恩戲假情真，默默嗒糖！

呢集一出，意味住周嘉洛同林凱恩正式玩完，該場「蔥Bon錫錫戲」更惹怒唔少粉絲，有忠實粉絲即鬧爆：「大家都知我哋好有耐性咁等咗一個月，畀咗超過一個月機會嘅時間編劇去收拾自己製造嘅殘局。但係去到今時今日，不可原諒！」對於網民不滿，監製林建祥就多謝觀眾捧場，又語帶保留指「安Bon」要經歷過先會珍惜對方，所以復合與否都係未知之數，至於周嘉洛亦指認為「安Bon」只係分別成長緊，會期待及後故事發展。