連詩雅太瘦被嫌「劖手」：試過有另一半用我啲骨按摩

藝人連詩雅（Shiga）以及楊詩敏（蝦頭）近日邀請李炘頤（Alina）做佢哋網台節目嘅嘉實，同大家探討「女人味」嘅話題。Alina表示問過男性朋友，佢哋睇女性身材同腳嘅比例都係「五十五十」，Shiga就表示雖然身材窈窕、有長腿，但都試過畀人嫌棄太骨感，仲自爆：「試過有另一半用我啲骨按摩！」非常搞笑。而蝦頭就自認有肉地，仲自豪咁話：「有肉地嘅女人其實好有Market，因為唔「劖手」，男人覺得好好攬！」

而Alina亦喺節目透露好多人對佢嘅第一印象都係好Cool，但識耐咗就發現佢傻傻地、幾可愛，而Shiga即時身同感受話自己都係咁，仲話：「但係你（Alina）嗰種唔會即刻畀人見到，但我係一講嘢就死，好快露晒餡。」其後佢仲大爆之前同林盛斌（阿Bob）一齊拍節目時，畀阿Bob話︰「阿連，你唔好再扮聰明啦，你就係要畀人睇到你真實嗰面，你就係蠢啊嘛！你唔好再扮聰明。」搞到全場爆笑。