新突破！李施嬅為《金宵2》獻聲　親自創作做才女

由藝人陳山聰、李施嬅主演嘅無綫新劇《金宵大廈2》將於下月4日播出，劇集首輯大受歡迎，更於台慶頒獎禮斬獲「最佳女配角」、「最受歡迎電視女角色」及「最受歡迎電視拍檔」多個獎項，新一輯自然備受矚目，而今次回巢拍攝續集，李施嬅亦有新突破，原來佢有份獻唱劇集插曲《相愛萬年》，歌曲更係由佢親自參與創作，令人相當期待，佢喺社交網宣布出歌消息：「第一次唱作。第一次自己個人嘅歌。期待一下。」拍檔陳山聰即留言支持：「期待期待。」其實李施嬅曾與海俊傑推出合唱歌《二次緣》小試牛刀，今次再出個人單曲甚至參與創作，大騷音樂才華！

施嬅今日接受東網訪問，她指新歌由她與表妹聯手創作：「係為咗《金宵大廈2》而作，但當時冇諗過真係會用得到，咁啱監製話要為套劇搵歌，佢喺機緣巧合下聽咗我首歌覺得合適，於是用咗。好開心，係上天安排，我負責作曲，由林若寧作詞，作詞都係要交畀大師級，佢寫到我想要嘅畫面，首歌會喺下星期一正式推出。」

她坦言出道時曾寫歌，但一直無人問津，亦無唱歌機會，直至前年跟海俊傑合唱：「當時同一間唱片公司合作咗一次，佢哋想再合作，叫我寫歌，我寫嘅時候唔知可以用到喺套劇入面，好感激唱片公司老闆咁支持同信任我，始終我唔係歌手，係佢畀膽我去唱同作歌。」