楊祐寧係《華燈》孤獨精　四世輪迴深愛林心如

台灣神劇《華燈初上》上周五（18日）終於迎嚟第三季上畫，大家急急腳入去睇真兇，各位主角亦喺社交網各出奇謀搶收視，估唔到唔係一班「小姐」最搶風頭，反而係飾演警官嘅男主角楊祐寧夠Gimmick，因為佢一口氣上載咗6張花絮相，又自嘲「被嫌棄的寶藏」、「被討厭的勇氣」等，揭露鏡頭背後佢被「杯葛」嘅一面。

當中見到林心如、楊謹華、王靜瑩拍劇空檔攬攬合照留念，楊祐寧卻被冇份合照，佢惟有自己企埋一邊攝鏡。另一張相就見到佢就同着上毛絨涼鞋嘅林心如對劇本，拍攝者好有心機咁影晒林心如完整全身，點知楊祐寧就慘被「斬頭」，樣都見唔到。加上佢上載多張獨自一人等埋位嘅相，一時被暴曬，一時又做孤獨精吹風扇瞓覺，睇見都戥佢慘。

而網友亦發現，林心如同楊祐寧過去一共合作過3套劇，包括《傾世皇妃》、《京城81號》以及《魔宮魅影》，再加上《華燈初上》，劇中每一個時代背景都唔同，但次次都係楊祐寧苦戀林心如，笑佢已經「四世輪迴」依舊得不到愛情果實。