Miley Cyrus飛去巴拉圭被閃電打爛飛機　緊急降落

正於南美舉行巡迴騷的美國天后Miley Cyrus，周二（22日）由哥倫比亞乘私人飛機前往巴拉圭首都Asunción，準備出席《Asuncionico音樂節》。飛機於空中闖進風暴中，被閃電打到正，機身損毀，被逼緊急降落！

Miley於社交網站上載機上拍攝的影片，窗外有強光閃動，又上載飛機被閃電打爛部份的照片。她留言表示：「我要向粉絲同所有聽到我飛去Asunción程機出事而擔心嘅人報告。我哋架機意外闖入一個未能預料出現嘅大風暴，被閃電擊中。同我一齊飛嘅工作人員、樂隊、朋友同家人，喺緊急降落之後都安全。不幸地我哋未能飛到巴拉圭。我愛大家。」她被逼取消巴拉圭的表演。

Miley姐姐Brandi於社交網站分享短片，其中她一邊飲酒定驚一邊表示：「我唔想誇張，但我哋差啲死咗。我哋因為被閃電打中，啱啱緊急降落咗去唔知邊度，距離目的地200哩。飲勝！」