邱澤婚後首見人　姣婆粉上身憶求婚爆喊：好緊張

台灣女神許瑋甯同邱澤去年底忽然宣布婚訊，從未認過拍拖嘅二人，一嚟就公布喜訊，成功震撼全亞洲！愛神隱嘅邱澤一直去到尋日（25日）先首次現身見人，以一身「姣婆粉」西裝造型上陣嘅佢，大方透露當時求婚嘅細節，佢就提到當時仍處於祕戀狀態嘅佢哋，對婚事有默契，但要開口求婚，邱澤都仲係好緊張、害怕，所以搵咗成班朋友幫忙助陣，揀埋溫馨場地，營造浪漫氛圍：「本來沒那麼緊張，但沒想到比工作、頒獎典禮都還緊張！」仲話成功抱得美人歸當下，佢兩個都已經感動到即場爆喊。

被問到佢係幾時發現許瑋甯係「對的人」時？邱澤又再次放閃謂：「隨時。」明顯勁冧老婆。至於婚禮因疫情暫緩，邱澤坦言希望婚禮簡單又不失溫馨，唔會大肆鋪張，但因疫情關係，所有細節仍需詳細討論。活動上，佢又幫許瑋甯揀衫，仲順勢讚愛宴：「我覺應該沒有她不能駕馭的衣服，尤其是時尚這類，她比我還Pro。」連環晒恩愛，羨煞旁人。而今日（26日）佢就為導演王鼎霖做伴郎，即被笑係為自己婚禮做「見習生」，將來可以參考吓。