胡諾言加入《流行都市》　擁4千萬物業身家唔輸其他主持

無綫藝人章志文7月將舉家移民加拿大，日前正式告別節目《流行都市》，並由另一位星爸胡諾言加入主持，日前佢首次為節目錄影，透露早在錄影前一日已入廠同大家打招呼，自己同安德尊、姚嘉妮早已認識，相信一定有好默契，對於能夠加入呢個大家庭感到榮幸。佢本身主持過唔少節目，但亦坦言少做人物訪問，今次可以趁機學習，邊做邊學，而熱愛跑步嘅佢又指現時1個星期會跑步3次，並指喺疫情下早已習慣戴口罩做運動。

《流行都市》一眾主持出名身家驚人，包括「元朗地王」安德尊及家住半億豪宅嘅黃嘉雯等，而胡諾言嘅身家都唔惹少，其實佢投資有道，早年與家人合資「上車」後，成功樓換樓，不但手持灝景灣及日出康城單位，更與太太陳琪各自持有西貢一間村屋，4個單位現時市值總超過4千萬，而佢一家五口現時則住超過2000呎嘅西貢3層獨立屋，身家豐厚。