與畢彼特同列「百大帥哥」　黃偉文揚言要退選

由美國電影評論網站TC Candler舉辦嘅「全球百大帥哥美女」排行榜，今屆有多位港星入圍，包括人氣男團MIRROR、ERROR、女神陳靜（DaDa）、盧慧敏、譚旻萱等，今日（27日）最新入圍嘅就有著名填詞人黃偉文（Wyman），更與美國男星畢彼特（Brad Pitt）同日宣布入圍。不過對此消息，Wyman就一笑置之，更自問不配「帥哥」行列，揚言希望退選：「首先，成件事我並無『參賽』完全被動，被提名咗都唔知咩事。陪大家開個玩笑，被大家惡作劇一下，喺疫情中提供一點歡樂，我係ok嘅，但我係無份用任何方式『搞』自己入去呢個名單嘅，非我性格亦非我所求，唯獨呢件事一定要講清楚。講完，請大家各適其適，繼續enjoy 呢個玩笑（自己知自己事我諗唔會唔係玩笑而真係有咁多人覺得我有機會成為全球百大美男啩哈哈哈）。不如大家笑過就算，尊重吓我意願，畀我退選啦唔該！」

雖然Wyman、MIRROR和ERROR成員們的入圍資格受到外界質疑，但有不少世界知名明星偶像同樣透過課金而成功入圍，包括BTS成員V、韓國男演員李鍾碩、中國男演員王一博，以及入圍TC Candler另一選舉「全球百大美女」的TWICE成員子瑜、BLACKPINK成員Jennie及中國冬奧金牌得主谷愛凌（Eileen Gu）等等，但最終能否打入百大，就要交由主辦方評審去決定。