邱芷微培訓童星做主角：佢哋話喊就喊好專業！

在《愛．回家之開心速遞》飾演「賈名媛」為人熟識的藝人邱芷微（Chelffy），與同是演員的男友陳志忠（Wilson）2年前創辦演藝學院，專門訓練小朋友的才藝，ViuTV熱播的《反起跑線聯盟》7個小演員主角，當中4人正是他們的學生，他們透露當日是聯同ViuTV為劇集合作搞試鏡，大約100個小朋友面試，到最後他們4個學生「中」咗Casting，他們說：「開心嘅，佢哋得4至6歲，有3個完全零經驗冇拍過嘢，得瑤瑤拍過廣告同戲，我哋由準備試鏡開始訓練佢哋，到正式演出時佢哋都好專業，話喊就喊，導演都有讚，佢哋啲戲一啲都唔輸比大人。」

有份參與《反》演出的Wilson指今次女友在幕後出咗好多功夫，因為拍攝時間長達3個月，女友日日由朝跟到晚：「佢都好辛苦，如果我唔使拍就會返學校做嘢，但佢就要照顧住啲小朋友，跟住拍攝進度，仲要即場教戲。」Chelffy依家睇番套劇，拍攝現場的畫面都湧上心頭，她說：「除咗事前嘅訓練，由我收到劇本就即刻睇晒十幾集嘅戲，當小說咁睇，然後研究，跟住分析每個小朋友嘅角色做啲乜，好似平時我做演員咁，都係好大挑戰。」

小朋友做核心主角

Wilson表示這套劇算是香港近20年，一齣以小朋友做核心主角，感覺幾創新，而且故事好貼地：「真係有血有流，拍攝嘅時候小朋友嘅家長都喺度，佢哋都有同我講話睇完個古仔，佢哋覺得好有共鳴，因為每一個小朋友嘅家庭好寫實，講緊時下家長照顧小朋友，面對佢哋嘅學業同日常生活，真係好貼地，有啲家長睇住拍，一路睇一路喊。」

他們坦言在面試過程中，有好多小朋友都唔係好大信心，唔知自己做乜：「其實Casting唔係淨係介紹自己，仲要做埋戲，但做戲唔係單背書，初初都有啲家長同小朋友都覺得好辛苦，甚至覺得麻煩想放棄，有啲覺得次次Casting都唔中，諗住博埋今次唔得就以後都唔去Cast。」所以劇集出街後，小朋友的表現獲讚，Chelffy說：「唔單係我哋嘅功勞，佢吔家長都有督促，配合係好緊要。」