洪永城爆前女友介意知己黃翠如 唐詩詠成嫌疑人
20220330
東網電視
更多新聞短片
![](/hk/bkn/cnt/entertainment/20220330/photo/bkn-20220330100248806-0330_00862_001_01p.jpg?20220330182544)
藝人洪永城去年同老婆梁諾妍成婚並誕下一女,愛女Amber剛剛出世100日,太太仲晒出同老公似足餅印嘅愛女Cutie相,婚姻美滿又幸福。近日洪永城接受J2節目《人夫放假約出去滾》嘅林盛斌(Bob)訪問時,就提到佢同黃翠如係多年好友,二人有如螢幕情侶一樣,直至二人各自搵到另一半先令緋聞終止,點知節目中,洪永城就罕有透露以前曾有女友懷疑佢同黃翠如係咪真係「撻着」,更搞到二人心中有條刺!
洪永城講到當年初入行,被幕後嫌佢中文唔好,唔識望鏡頭又唔夠搞笑,佢直言好Hurt:「亦都係咁嘅環境下,日日夜夜畀工作人員、攝影師問候屋企人,慢慢就成長。」佢又同好友陸浩明(6號)請教主持技巧。到後來佢同黃翠如開始合作,慢慢由最佳拍檔變「銀幕情侶」,深受觀眾喜愛,洪永城自爆︰「嗰時拍拖個女朋友都有少少擔心㗎,話我同佢咁合拍嘅,你兩個喺螢光幕面前咁夾嘅,你哋有冇嘢㗎?(你點話佢知呢?)我對佢冇,佢對我……(就唔知啦!)係啦!」Bob再追問佢有冇曾經有一刻鍾意黃翠如?洪永城靜幾秒後答︰「呢個答案可能會令到你覺得失望,冇!(真係好好嘅朋友、好兄弟?)冇錯。(好肯定?)好肯定,真係冇!真係工作夥伴嚟咋。(黃翠如都係一個靚女,佢唔係你鍾意個類型定咩?)但係我真係唔知道點答你,唔夾就唔夾,唔係佢性格有咩問題或者缺陷,去到話女朋友,大家都冇呢種感覺,就冇呢種感覺㗎喇!」
洪永城反而提到自己同黃翠如深厚嘅友誼,互相支持又同渡難關,洪永城指自己加入TVB後,黃翠如因為某啲原因唔開心:「大家會連續幾晚講電話,佢嗰邊又喊,我又感動,大家一齊喺度扶持,你有啲咩事,有我喺度,我將來有啲咩事,你又可以幫助我,因為佢一個女士喺娛樂圈其實真係唔容易。」
Bob續表示洪永城近年面對唔少輿論壓力,或網民批評,問到當時佢嘅「最佳女朋友」有冇支持他?雖然Bob未有指名道姓,但網友就猜測曾有該頭銜嘅唐詩詠,洪永城話︰「都有嘅,好緊要嘅,一齊去經歷吖嘛,不過好可惜,始終好多嘢都有條刺,好難去再修補創傷,繼續行落去,都冇辦法嘅,緣分囉!冇緣分都冇辦法!」