陳安立求婚成功　前《東張》女神林希靈準備做人妻

前《東張西望》主持人林希靈（Agnes）早前離巢無綫，過檔香港開電視做主持，但原來佢今年唔止事業上有新發展，感情上更有新突破，呢日佢宣布獲ViuTV男友陳安立求婚成功，準備升呢做人妻！2人分別於社交網大晒求婚當日嘅靚相，見陳安立喺海旁向女友求婚，並為佢戴上婚戒，場面浪漫，陳安立憶述求婚時嘅情景：「求婚時候，我邊拿着手機，邊説着情深説話。一直以為有錄影，卻原來從沒有Roll機。無辦法，惟有用餘生慢慢再説。」而林希靈亦和應：「我最好的朋友，餘生請多多指教。」

林希靈獲男友陳安立求婚，她說：「多謝大家祝福，佢求咗婚喇，但求婚過程都幾搞笑同埋蝦碌囉。」首先安立約求婚布置的人約錯時間，本身是約夜晚，點知求完婚第二朝布置的朋友先到，她笑說：「佢臨求婚之前，不停問我有冇新年願望，原來佢想我講新一年做人妻，但我又唔知，咪講身體健康、世界和平之類，見佢呆咗，支吾以對拎戒指出嚟，我先知佢想求婚。」

她又笑安立一直拎住手機，想紀錄求婚過程，但求完婚搞完一大輪先發覺，一秒都錄唔到，她笑說：「我覺得今次真係好搞笑、夠晒難忘，我相信會一路記住。」她透露他們已預訂了年尾結婚和擺酒。