內地節目撐港樂　李玟楊千嬅攜手捧17歲炎明熹

王祖藍被踢爆辭任無綫首席創意官，不過佢本身搞開、同內地平台合辦嘅大型音樂綜藝節目《聲生不息》就繼續有得做，仲搵嚟大班港將猛人助陣，好似天后李玟、李克勤、楊千嬅、葉蒨文、林曉峰等，提攜一眾後輩炎明熹（GiGi）、許靖韻、毛不易等，真係星光熠熠！最近節目組就搞民選「港樂」，嗌網友投票揀心水香港歌做表演曲目，宣傳廣東歌，投票歌單一共有20首作品，當中就有唔少大家耳熟能詳嘅經典金曲，好似張國榮、梅艷芳、Beyond同李克勤嘅歌，仲有陳奕迅嘅《葡萄成熟時》、譚詠麟《愛情陷阱》等，搞到一班歌迷都好雀躍，個個等第一次公演時可以親耳聽到偶像翻唱好歌。

節目錄影進行得如火如荼，李玟、楊千嬅、林曉峰、毛不易呢兩日就被網友被拍得出入拍攝現場嘅靚相，而今次聲夢人氣王炎明熹就被指係重點新星，有一班前輩拱照，令佢都有機會北上發圍，咁啱今日（9日）亦係佢17歲生日，人仔細細嘅佢雖然仲未「現身」，不過就有好姐妹鍾柔美（Yumi）晒出舊合照慶祝。