《金宵2》贏口碑輸收視　陳山聰阿Q精神冇失望

藝人陳山聰今日（26日）到柴灣拍攝廣告，擔任維特健靈旗下產品代言人，為期兩年合約酬金不俗，山聰笑說：「搵幾多都好唔關我事，所有嘅嘢都益晒我屋企個肥仔陳霆軒（囝囝），入咗去佢個慈善基金。我好感恩嘅，因為已經有差唔多兩年時間，完全冇晒外快收入！」

談到《金宵大廈2》贏口碑輸收視，山聰坦言未有失望：「呢套劇好高質素，好多人話畀錢買飛入場睇都值。因為編劇大膽創新，可能有觀眾睇唔明白，亦可能太過恐怖家長唔畀小朋友睇，但係真係好多人談論，而且跨平台收視好好，可能觀眾係等做晒嘢，小朋友瞓咗先上網睇番，所以正常嘅收視係唔可以作準嘅。」他坦言如果收視好絕對是錦上添花，但要集齊收視及口碑等相信亦絕非易事。

至於網民猜測首集「靈魂人物」劉江於結局驚喜現身，山聰表示：「我唔可以講咁多，大家到時睇吓啦。可能係因為首集好多角色都出晒，所以先至有咁嘅猜測啫，咁可能阿蕭（《金宵大廈》陳山聰角色名字）都會出現㗎喎。」