瞓波波池獲周志文讚靚　劉佩玥冧爆：因為幸福

藝人劉佩玥（Moon）經常嘻嘻哈哈笑容滿面，畀人有「大笑姑婆」嘅感覺，佢喺社交網甫咗幾張之前工作時喺波波池玩嘅相，留言：「看一下之前工作時的照片，哈哈 ！很傻很開心的自己哈哈！最近感覺每天用電話的時間少了，書看多了思考多了時間好用多了心情舒暢多了，有時候大概習慣子被甚麽牽著走，忘了自己可以建立另一種習慣，不過有些習慣還是不改的好，就是笑！哈哈！來！笑一個吧。」

阿Moon睇番啲相見自己笑成咁，話自己都忍唔住笑，不過佢又啱喎，人生嘅嘢正所謂開心又係咁過，唔開心又係咁過，當然係笑住嚟過着數啲啦，網民都似乎好認同佢呢個想法，紛紛留言讚佢笑得好甜，叫佢一定要Keep住呢個習慣，而好友羅天宇就留言：「我鍾意最後嗰張」，不過睇番張相係阿Moon將啲波波拋起晒，完全見唔到佢個樣嘅，睇嚟天宇都畀阿Moon嘅笑容感染到，學識放吓笑彈引大家笑喎。至於緋聞男友周志文都留言大讚「笑得好靚」，Moon更回覆：「因為幸福」，表現曖昧。