羅志祥高呼「喜歡一個人」　網友重提偷食事件贈興

台灣天王羅志祥（小豬）2年前被前女友周揚青公開大爆荒淫史，當年嘅「毀滅式分手」令小豬事業全面嗌停，更成為網友茶餘飯後嘅話題，不過小豬自年初跨年騷正式復出之後，人氣回歸，聲譽亦同樣返番嚟，再次建立好男人形象。再次爆紅後，小豬都一如以往，有咩都喺社交網同大家分享，近日佢就感性寫下3組「雙關語」，其中一句「特別喜歡一個人」，更引發外界揣測。

小豬留言：「小時候…偷偷吃泡麵；現在…偷偷吃泡麵；小時候～特別怕父母知道；現在～特別怕父母知道；以前，特別喜歡一個人；現在，特別喜歡一個人」本身只係分享「雙關語」嘅佢，被誤會想公開認愛，搞到要急急解釋：「小時候喜歡一個人；現在喜歡獨自一個人」點知網友重點不在於此，有口痕友就模仿句式，暗寸佢「小時候偷吃、現在偷吃」，重提佢當年嘅「多人運動」偷食事件，不過小豬就未有理會，只係同撐佢嘅網友留言互動。