余德丞突然宣布離巢 竟然關阿媽點燈續命事!

20220501
東網電視
更多新聞短片
上位小生余德丞喺早前播出嘅無綫劇集《青春不要臉》入面,表現優秀而獲讚,最近更入圍「全球百大帥哥2022」,估唔到佢喺今日凌晨,上載新片到個人Channel突然宣布離巢,約滿TVB結束8年賓主情!片中佢除咗剖白心聲,又向TVB講Bye Bye,拍低自己執包袱全程,亦有指佢將極速開新工,同觀眾見面,而離巢原因就唔關健康事,亦係考慮咗好耐先決定走人。
片中佢先清理個人儲物櫃,櫃內貼住佢轉做藝員後第一次影嘅靚仔相,同初期主持兒童節目《Think Big》時小朋友送嘅聖誕卡等。片中佢提到自己喺TVB嘅回憶及感受,仲自嘲冇代表作:「喺TVB時做過奧運、講波;又拍飲食及旅遊節目,又拍過劇,最後係《青春不要臉》,8年冇白過,雖然冇代表作,但咩都試過,至少盡心盡力做過。」
不過話峰一轉,佢就重提2018年因踢足球引發心臟出事昏迷入院,當中更因家人被牽連入報道之中,至今仍耿耿於懷:「當時有個人出嚟話我阿媽去跪佢幫我免費點燈續命,但根本我同媽咪唔識呢個人,我哋識嘅人都冇人去搵過佢,我當時好想企出嚟,但公司認為最好嘅回應就係唔回應,最後更只係叫我答:『多謝關心,我沒有回應。』我唔明點解要咁,係啱就啱;係錯就錯,但依家咁回應,咪令其他人更多揣測,有冇諗過咁嘅決定會有影響,仲會伸延落去,以後人哋諗起我都諗起呢件事。我自己做呢行冇所謂,但我媽咪出到去人哋會點諗佢,咁係傷害一個唔係呢行嘅人。到依家我仲可以坐喺度,好多人就覺得係因為我媽咪去點燈續命。」即令網友不禁揣測呢個可能係佢離巢主因!
無綫高層樂易玲亦有就余德丞離巢一事,喺社交網發表感受,坦言好理解對方決定並送上祝福,佢寫道:「Dickson年多前同我講過,32歲係男人嘅黃金歲月,好想往外闖,給自己摸索一下外面的世界,對公司講雖然可惜,但我作為佢嘅長輩很能理解…出去走一圈,償心願…」佢透露因自己仍在隔離中,所以上星期Dickson返無綫辦理手續時,錯過了同對方坐低飲杯咖啡嘅機會,佢又祝對方一切順利同埋身體健康。