解凍過後有運行！馮盈盈拍住陳凱琳入圍全球百大美女

由美國電影評論網站TC Candler舉辦嘅「全球百大型男美女排行榜」2022年入圍提名名單繼續陸續公布，再有多位香港藝人成功躋身，百大美女方面，近年升呢「KOL天后」嘅前港姐冠軍、索爆人妻陳凱琳日前成功入圍，今日（7日）就輪到同為港姐冠軍嘅師妹馮盈盈接力跑出，佢早前被指獲無綫「解凍」後即有運行，孭飛主持綜藝之餘，今次仲入圍埋「百大美女」，絕對為幕前事業打咗支強心針！

至於百大型男，歌手胡鴻鈞（Hubert）就帶埋星夢小師弟冼靖峰（Archie）入圍，而ViuTV方面，則有《全民造星II》冠軍、組合P1X3L成員吳啟洋（Phoebus）入圍。