母親節爭住擺童年照　你認得幾多個藝人？

今日（8日）係一年一度母親節，唔少藝人都會好似過節咁，紛紛揀今日上載童年照，再抒發對媽媽嘅一片孝心，幾咁搶鏡！今年一眾藝人依舊晒相，當中就好似型男陳偉霆及內地當紅花旦楊紫咁，晒出細個同媽咪嘅合照。見陳偉霆細個同依家似到十足，佢仲着晒西裝咁雙手舉起Yeah，陳媽媽就笑容十足咁將佢抱起，畫面溫馨又好笑。楊紫細個嗰時就面圓圓，個頭成粒波咁，萌樣盡出，佢仲一口氣晒夠6張母女合照，氹到佢啲粉絲勁開心，係咁話女神同細個差別大，細個夠Cute夠圓潤，依家搣甩Baby Fat就變女神，下巴尖尖引死人。

至於台灣女星林心如，佢今次就晒出阿女親手整畀佢嘅母親節禮物，有花束仔同粉色糖果，兩樣都非常有少女心，加上係阿女整嘅，就更加甜入心，唔怪得佢收到之後，即使素顏都要影相留念啦！