闊別近百集終於「回家」！張景淳回歸即同大小姐開火

藝人張景淳憑處境劇《愛．回家之開心速遞》「龔燁」一角深受網民喜愛，惟去年尾有指佢經常遲到，而被無綫高層曾勵珍「照肺」兼飛出劇組，直至上月有傳解凍成功，但劇集始終一直未見其身影，令唔少網民擔心其「回家」路再有變數，而昨日（9日）播出一集張景淳終於「回家」，亦係相隔90多集後終於出現。

劇情講到佢準備回港時喺外地遭逢戰亂，又被「大小姐」林淑敏取消其頭等機票，令佢折騰足足76小時先成功返港，同現實中嘅「回家」路一樣咁難行。之後佢為咗同「大小姐」鬥氣，刻意向其對頭人示好，但無奈最終都係要靠「大小姐」出手，先避免再被調走，其中一幕「大小姐」直斥佢「契弟」，張景淳又回敬叫佢「八婆」，充滿火花，獲網民大讚張景淳狀態大勇，回歸後演技再躍進，而佢亦喺社交網晒出該集劇本以及收睇播出嘅照片，多謝大家嘅支持，並標籤上「93days」，記錄事隔93日再次開工的感受。