Edan晒《季前賽》抄車眾生相　 張繼聰以德報怨回敬

人氣男團Mirror成員呂爵安（Edan）近排同張繼聰、姜濤、陳卓賢（Ian）、邱士縉（Stanley）、梁業（肥仔）、郭嘉駿（193）等，拍攝ViuTV劇集《季前賽》。尋日（9日）佢就喺社交網公布劇集終於煞科，仲Post出劇中眾生相畀大家睇，見佢勁「有心」偷拍眾演員嘅瞓覺相，仲要每張都大頭兼Close up，認真夠「老友」。佢仲喺貼文寫到：「事實證明，睡眠是很重要的！」

而張繼聰亦都唔執輸，喺今日（10日）貼出Edan嘅瞓覺大頭相！仲喺貼文寫到：「幼雀，你睇阿叔幾錫住你？影到你瞓着都咁靚仔，算係咁啦！以德報怨，咪叫成熟囉！不過你班兄弟就唔知會唔會啦！」之後邱士縉（Stanley）隨即留言話：「一人一張呂爵安黑圖計劃正式開始！」而粉絲亦留言話：「好鍾意幼雀呢個名，期待季前賽。」認真搞笑呀！