曾掀炸雞潮！一張相透露MIRROR再任代言

男團MIRROR人氣爆燈，去年佢哋為快餐店炸雞代言推出閃卡，掀起全城食炸雞儲卡熱潮，近日該快餐店再有新搞作，甫出一張3位男子嘅背影相，雖然成張相只得個後尾枕，連側面都冇，但一班「鏡粉」火速認出係MIRROR嘅姜濤、Edan及Anson Lo，事關相中3子所着嘅風衣上印有嘅號碼「63」、「91」及「99」，正正係佢哋3個參加《全民造星》時嘅號碼，而佢哋曾化身籃球員拍攝一系列廣告，當時亦一早着過該號碼嘅球衣亮相，而今次背影照一出，即「鏡粉」暴動，紛紛留言表示期待。