毛俊輝將一生所學為粵劇創新:希望新作同現代觀眾接軌

2022年05月13日 16:01
東網電視
更多新聞短片
「戲劇大師」毛俊輝今日(13日)出席由他牽頭的劇藝研創計劃啟動儀式,其太太兼粵劇名伶胡美儀也有現身捧場。毛俊輝透露計劃籌備近2年:「早期爭取去做好難,好感激政府同賽馬會理解我哋,呢個計劃可以幫到業界,希望通過研究同實踐將傳統粵劇藝術創新。今次邀請到好多老中青粵劇藝術家幫手,龍貫天及阮兆輝會擔任顧問,我就出力,將我一生所學嘅為業界創新,以及將專業人士結合起嚟。(係咪需要好大筆資金去做?)我呢個係3年計劃,要時間去做研究同實踐,得到賽馬會支持,大概有7至8位數資金,佢哋理解呢個計劃重要性,算係創舉。」
問到最終目標是甚麼?她說:「想有新作品作為一個樣板,可以同現代觀眾接軌,因為粵劇係傳統亦係時尚,要畀觀眾去接受,難就難在呢方面,希望可創作出新現代類型戲曲。我哋會有演出計劃,但只係一個示範,畀人睇到一個新方法同模式,吸引人去支持再放大。」胡美儀稱丈夫對西方戲劇非常熟悉,同時熱愛中國戲曲,故將中西文化結合,為傳統粵劇藝術創新。
將中西文化在粵劇中結合
粵劇名伶阮兆輝表示受計劃創始人毛俊輝邀請出任顧問:「我哋雖然不同界別,但一直有交流,同佢係相識幾十年嘅好朋友。(會點幫手?)我睇佢,我會配合佢,問我意見就畀意見,佢大致上有方向同宗旨,但細節方面可能未定好。」
講到對方有意把中西文化在粵劇中結合,他指這是一直以來的大方向:「覺得佢會做得到,因為佢好通透,唔係流於表面嘅人,佢好深入,佢本身學過京劇。(希望粵劇可吸引年輕一代觀眾?)係我哋心願,亦都係多年來嘅口號,但要解決好多問題同花好多心機,關乎學養以及對藝術嘅修養。」他指最近開辦了BB南音班,也是志在培養新一代對粵劇的興趣:「3、4歲就可以參加,畀佢哋去玩吓。」
另外,阮兆輝太太鄧拱璧是曾江前妻,早前曾江不幸離世,問到太太的心情,他說:「冇事,大人嚟㗎。(有冇安慰太太?)做咗應該做嘅嘢。(身後事會唔會幫手?)完全冇需要,以我嘅身份我唔會主動去做,亦唔輪到我去做。」