吳婉芳二仔胡智同開個人藝術展覽:畫畫可以紓緩壓力

2022年05月14日 12:01
東網電視
更多新聞短片
前港姐吳婉芳與已故富商胡家驊的次子胡智同(Lynus)不單是健美選手與私人健身教練,在牛津大學藝術系畢業的他也是一名新進藝術家,可謂文武雙全。他將於5月21日至24日舉行首個個人畫展,名為《胡智同:色彩的巡禮》,展出30件作品,而最特別之處是展覽地點定於Lynus開設的健身中心內,是次展覽亦可視為健身中心的揭幕禮,把看似風馬牛不相及的藝術與健身結合。
他稱一直有意開個人展覽,並籌備了6年之久,但近兩年才開始有Concept Gym(概念健身室)這個構思:「我唔想啲人只係嚟做Gym,而係可以同人交流,可以睇畫,可以做好多唔同嘢,唔止係一個健身室咁簡單。我部分畫作會長駐,亦會放其他藝術家嘅作品。(覺得藝術同健身有咩相似?)首先Gym係藝術一部分,因為大部分人健身都係想操得個身形靚,呢個已經係藝術,第二係兩樣嘢都可以幫到人,畫畫可以緩到壓力,健身都係,我教人健身都係想幫人釋放壓力。」
他表示所有作品可視作他的私人日記,身邊發生的人與事及感受,他都會透過畫筆去紀錄及表達,其中《~700納米》系列八幅肖像畫,就以他的親友為繪畫對象,包括媽咪以及祖父母,他解釋:「嗰8幅畫順次序去睇,會現由普通嘅紅色背景而變到好抽象,象徵我嘅創作生涯,由學生時代要畫得好傳神,後來加入自己嘅想法同創作。(點解揀佢哋做主角?)因為好熟悉,佢哋見證我慢慢成為藝術家,所以我想以繪畫方式去多謝佢哋,八幅畫會送番畀本人。」問到繪畫媽咪時的想法,他指畫畫時會想起跟媽咪相處的生活點滴:「想透過畫去表達出媽咪嘅仁慈,同埋無論我做咩,佢都好支持我,從來冇質疑我。」他自言小時候志願是當建築師,但升上中學便發現自己真正感興趣的是藝術:「我其實係鍾意建築入面嘅藝術,記得13、14歲去完個夏令營,發現唔係特別鍾意做建築嘅嘢。(你唔做建築師,家人有冇失望?) 冇,佢哋反而開心,因為如果我讀咗建築之後先發現唔開心,又要轉,早發現好過遲發現,全家人都好支持我,只要係我鍾意同有心去做,佢哋就一定支持。」Lynus天生明星相,問他會否有意入行做藝人?他說:「冇諗過,我想專心做健身室同藝術去幫助人,想放晒全副心思喺入面。」
場地:REP.
髮型:Vivian Ng@Salon Nova Hair Nail