張敬軒感觸疫境開騷波折重重:多謝每位觀眾對我包容

2022年05月14日 18:01
東網電視
更多新聞短片
歌手張敬軒(軒仔)紅館騷《THE NEXT20演唱會》第4晚,男圑MIRROR成員Stanley帶女朋友Alina到場支持。軒仔跟觀眾訴心聲,坦言不想再於張竹君醫生口中聽到他的名字。談及今次疫情緩和補場,他透露曾有跟公司表達意見:「不如我哋搵過個時間再開啦,我真係唔想再喺張(竹君)醫生個口到聽到『張敬軒』呢三個字。我哋同事係咪可以送張飛畀張醫生睇?佢呢3年都好辛苦。我又好擔心明明大家好開心睇演唱會,我哋又好辛苦做好個製作,但係好多不明因素之下,令大家有人生安全憂慮。1月份暫停個騷後,我好多晚都好難瞓得着。公司同我講,退飛觀眾唔夠3%,我喺呢度真係要多謝大家,多謝每位觀眾喺呢20年裏面,對我包容同愛。」
之前第2晚及第3晚,軒仔請來吳林峰及洪嘉豪做嘉賓,而第4晚就請來樂隊Dear Jane。軒仔表示很喜歡吳林峰的聲音,兩人認識由網友開始,及後邀請吳林峰為他寫歌,對方非常快手,交了5首高質作品給他,更預告很快便會聽到人合作的作品面世。吳林峰則表示,當他收到軒仔工作人員邀請他任演唱會嘉賓的電話:「會唔會係搞錯?係咪想搵林峯咋?」引得觀眾哈哈大笑,接着又說,從前參加歌唱比賽,別人告訴他,唱張敬軒歌一定可以入決賽,更說可以溝到女。他信以為真,便揀選軒仔的歌,不過就從未入過決賽。曾經他懷疑過,一定是歌的問題,不過現在回想應該是自己個人問題。軒仔說:「一定係你個人問題啦!哈哈。不過唔緊要,今晚咁多觀眾係到做評判,都聽到你咁美好嘅歌聲,我再交個台畀你唱多首啦。」
送咪畀洪嘉豪
嘉賓洪嘉豪上台時,向軒仔這位哥哥道謝,表白沒有張敬軒就不會有洪嘉豪,場面感人。洪嘉豪是軒仔前經理人的兒子,從小便跟着媽媽及軒仔開工:「我識咗軒仔20年,當我讀大學嗰陣,我同媽咪講想試吓作曲做音樂,我就突然收到軒仔電話,叫我喺尖沙咀某某琴行等,然後佢就買晒所有製作音樂嘅器材畀我,琴啦、電腦啦好多好多,直到聽到由洪嘉豪作曲嘅音樂,都係用佢送畀我嘅器材做出嚟,流住張敬軒DNA,冇張敬軒就冇洪嘉豪今日音樂上嘅道路。真係好感恩,所以我今日特別送咗花送畀你。」
軒仔接過花就口多多說:「長話短說啦,你送花畀我,我都要回個禮。」然後將跟隨自己多年的紅色咪送給洪嘉豪:「你記唔記得有一年你跟我去澳門演唱會,我想落台聽吓觀眾席啲聲,叫你幫我代唱時,你就係用呢支咪,依家我將呢支跟咗我十年嘅咪送畀你,希望你有一日拎住呢支咪上紅館!」洪嘉豪謂沒有想過軒仔會將這麼貴重、有紀念價值的咪送給他,當場被感動得差點落淚。
軒仔請來Dear Jane,他坦言跟樂隊的緣分真的兜兜轉轉:「佢哋開演唱會,自己好想去做嘉賓,但又撞咗期,上次邀請咗佢哋嚟做嘉賓,啱啱好就係殺停咗佢哋答應嚟做嘉賓嘅日子,好彩今次大家可以真正相聚。」
借錄音室畀Dear Jane包食宿
Dear Jane表示認識軒仔10幾年:「當時軒仔買錄音機嚟我哋Band房,啱啱瞓醒個樣。之前有一個好靚嘅錄音室喺廣州,免費借畀我哋用幾日,準備埋食宿,3餐包晒!最特別係知我哋錄完音好肚餓,連消夜都準備埋,5,6年前,我已經教佢哋隔離,真係好細心,好多謝你。」軒仔就話:「我係Dear Jane Fans嘛。」隨後,Dear Jane表示帶備禮物送給軒仔,叫軒仔站在他們中間,然後四人一齊向他做心心手勢,軒仔開心大笑:「我好少畀4個佬咁樣,哈哈哈,好驚嚇,多謝曬,Love You too!」