曾江女兒︱曾慕雪最想同爸爸講:我哋會好好前行

2022年05月14日 19:01
東網電視
更多新聞短片
曾江女兒曾慕雪接受車淑梅訪問細訴其亡父的生活點滴,她表示自己依然未能接受爸爸離世的事實,因有好多事需要處理,所以會以穩定的情緒去面對。至於其哥哥,因為長居加拿大,加上疫情措施非常複雜,所以不會回港。她最想跟爸爸講的說話是「爹哋我哋OK!我哋會好好前行,所以爹哋你都可以Move on!」她再說:「爹哋呢一生好圓滿,做到好多事情令大家都會記住佢,外界畀到好多愛同祝福我哋一家人,心好暖。爹哋好叻,好似依然照顧住我地咁。焦姣Auntie 係一個堅強嘅人,不過所有正常嘅感情都會唔捨得,一時OK,一時想起又會好掛住。」
她又指父親曾江是個好開心、隨心的人:「冇幾耐前,佢同我講佢呢一生真係好爽!呢幾個月真係好悶,好想行開吓。(有沒有勸他不要去?)我爹哋决定咗好難說服佢,我支持佢嘅方法就係令事情安排順利啲。我好尊重佢,因為無人知道下一步會發生咩事,所以唔可以調番轉頭指有乜嘢出錯……大家都見佢喺新加坡、馬來西亞食得玩得幾咁開心,相信呢啲就係佢最想要嘅。」
被問到爸爸生前可有提及生死,她說:「有,佢有講過。佢一路都話,簡單啲,唔好搞咁多嘢!佢細個嘅時候係天主教,但唔係十分虔誠嗰種。喪禮用咩形式仲未決定,有啲手續仍然處理緊,會低調,未必咁公開,暫時未有具體資料可以分享。」如果要送一件物品留在爸爸身邊,她表示會選擇畫紙和畫筆,因為爸爸喜歡畫畫,而且畫得很好。
活到老學到老
她憶述小時候跟曾江到片場感覺沉悶,演員工作對她來說並不吸引:「佢嗰陣做《勢不低頭》嘅陸國榮角色,出街真係畀人鬧,好搞笑,原來啲人真係分唔到係做戲。爹哋好自我,鍾意有自己空間,會喺街上對人唔瞅唔睬,黑面唔理人。其實佢好低調,特別係同焦姣Auntie一齊之後就更加低調。我鍾意講古仔,揀咗舞台劇,好幸運父母都支持我。入咗演藝學院之後,我成日同爹哋講戲。佢識好多古今中外嘅戲,好有研究。佢真係活到老學到老,對人生好有Passion。佢又鍾意畫畫、飾物、襯衫、靚嘅嘢,人生所有嘅事都係佢點點滴滴嘅藝術!」
收拾心情繼續向前行
她指父親給她很大的力量,她要告訴自己現階段不應該留於好傷感,或甚麼也不做的狀態,因為這並非曾江想看到:「如果係佢,佢會收拾心情繼續向前行,享受每一刻!」她又說:「我好幸運曾江係我爸爸,佢對輝Uncle(繼父阮兆輝)應該冇呷醋。我相信佢知道一個冇血緣嘅人係幾咁錫我,佢會好安樂。媽咪(鄧拱璧)都好好,我哋全家人繼續專心工作,因為世界要繼續向前。大家都有好多同爹哋嘅回憶,令我哋永遠掛住佢。」