爆操女神︱陳婉衡瞓身傳授秘技 如何操出腿部最美線條

20220516
東網電視
更多新聞短片
繽FUN星網全新節目《爆操女神》,頭炮請來「無綫咪神」陳婉衡(Alycia)充當教練,孖住繽FUN主播嘉琪一齊做全身鍛練,逐步糾正大家正確嘅動作,繼肌肉鍛練、蜜桃臀同操腹肌後,壓軸一集就傳授操腿部線條嘅秘訣,相信不論男、女士都好有興趣,事不宜遲,就由Alycia上場講解啦,今次連嘉琪都一齊做埋一份。
兩個動作分別為「Squat深蹲」及「Lunge」,當大家做深蹲動作時,其實隨住腳部擺位不同,也可以鍛練到腳部不同位置嘅肌肉,深蹲係點做呢?Alycia說:「首先雙腳打開到差唔多膊頭嘅闊度,跟住就坐向後,幻想後邊有張櫈,但切記上嚟嘅時候唔好用腳趾上,用腳踭推自己上嚟,個身唔好烏太前,盡量坐後,用腳踭推自己上嚟,如果用咗腳尖,好多時啲力會卸咗去前大腿度,可能有啲男士們練到個大腿肌肉好大嚿,女士們如果想避免呢一樣嘢,想練後邊嘅線條,盡量用腳踭上就會做到。」若然男士想鍛練腳部線條,建議雙手加一些如啞鈴般嘅重量,更說:「如果想練大腿內側,好多女仔想要個空位,都係靠深蹲,但係就擘大步少少,差唔多比膊頭大小小嘅闊度,同埋隻腳有少少外八字,蹲下時膝頭係要對住第2同埋第3隻腳趾,千祈唔好內八,否則好易傷到膝頭哥,呢個就叫做『Sumo Squat』。」Alycia建議做5下為一Set,期間大髀內側慢慢有燃燒感覺。
第2個動作「Lunge」,先做左邊腳,右邊腳向後一大步,切記左腳大腿同小腿之間要有90度角,之後身體挺直慢慢上來,切勿把身體後後傾:「幻想天花板有條魚絲吊我哋上去咁樣,動作係上落上落,同埋做嘅時候留意番,膝頭哥唔好左右搖擺,因為好易傷到膝頭,同埋唔好過前,要肯定個腳踭下邊,後邊膝頭哥盡量唔掂地,落到差唔多一寸左右就要上嚟,另一邊都係咁樣做。」Alycia話呢個動動作主要針對後大腿,通常做開運動嘅人,後大腿有個肌肉凸出來,突出嚟嘅線條就係練呢個位,仲提到好多人認為練蜜桃臀只需集中練臀部,但往往因為後大腿冇力托上去,結果會出現臀部下垂情況,所以要練一個靚蜜桃臀,其實腿部功夫都唔可以忽視。一連跟住做兩個動作嘅嘉琪,經過前3集訓練後,體力已大大提升,但面對一雙腿又上又落,嘉琪喺後段有點力有不逮,更戲言:「我隻腳廢咗啦!」
Alycia趁嘉琪「回氣」時段,即把握時間向大家補充練習時點樣可以避免受傷:「如果練腳嘅話,做深蹲或者頭先個Lunge,完成動作之後,記住對腳嘅關節唔好伸直,要Keep住有少少走盞位,Lock實又要卸去負重嘅力的話,好容易會受傷。」故她建議做任何動作都不能一步登天,正所謂欲速則不達,希望大家都養成做運動習慣啦!