炎明熹街邊大歎臭豆腐　獲內地網民激讚接地氣

無綫與芒果TV聯手打造的音樂綜藝節目《聲生不息》現正熱播，帶挈炎明熹（Gigi）、曾比特（Mike）等新生代歌手於內地爆紅，雖然人氣今非昔比，但佢哋一於少理，難得到內地錄影節目，當然趁機出動四周遊覽，早前李克勤同Gigi就被網民野生捕獲行山，但原來當日佢哋行完山仲去到平民小店歎臭豆腐，遇到群眾圍觀不但未有阻止，更開放途人合照，相當親民冇架子！另邊廂，「父子檔」林子祥同Mike一樣貼地，Mike搭地鐵暢遊，林子祥就行超市，獲內地網民激讚港星樸素接地氣，仲令「長沙有多容易偶遇聲生不息歌手」成為熱話。