林夏薇新劇演獸醫　養狗經驗大派用場

視后林夏薇自今年初獲獎後便忙不停，早前完成無綫劇集《法言人》後，還未來得及小休數天，便無縫接連開拍另一套新劇《寵愛Pet Pet》，飾演獸醫的她接受東網訪問時，透露每日開廠也很熱鬧：「因為戲入面有好多動物，蛇、兔仔、貓、狗、蜥蜴等，但同我最多對手戲嘅係狗狗『冬甩』，佢飾演我嘅愛犬（你唔出動3隻愛犬？）唔得啦，我照顧唔到咁多，因為要專注喺角色度，分唔到身。」

薇薇更指今次終於可以把多年養狗經驗大派用場，還大讚「冬甩」非常聰明：「佢係其中一位演員養嘅，好叻，亦係千挑萬選突圍而出，首次見面已經好熱情（同寵物演戲好難？）一齊演係高難度，因為佢哋集中力唔會好長時間，所有戲要拍佢哋先，好在全部都好乖。」雖然該劇開拍沒多久，但薇薇卻大多於早上時份才收工，往往回家途中遇上打工仔返工時間，結果要塞一大輪車才成功返到山頂寓所，變相每日也要OT，認真慘情！