莊思明享受隔離生活 佛山歎盡美食預咗要還

2022年05月20日 20:01
東網電視
更多新聞短片
藝人莊思明現時於佛山為無綫新劇拍攝中,同行的還有男友楊明、家姐莊鍶敏、姚子羚、蔡潔等。已到達當地約一個月的她,坦言酒店隔離生活比她想像中簡單,反而有點享受,她說:「初時都覺得有啲唔慣,全日得自己一個好靜,後來反而OK,有規律咗,因為會自己安排嘢做,我每日都會做運動,食嗰方面,會控制食量,初初會食午餐、晚餐,之後就連晚餐都唔食,免得隔離完會肥咗。」她指現時已進入工作狀態,空間時就會去做運動:「呢度太多美食嘞!樣樣都想試,所以我已經Join咗健身院,勤力啲做運動,食完都冇咁大罪惡感。我都有周圍行,我好鍾意行超市,所以都有成日行吓!但疫情關係,都唔會行得太遠。」
見唔到愛犬BB最後一面
思明家中多隻愛犬,她坦言最不習慣就是見不到牠們,尤其是柴犬Haru:「我知佢好嬲,我同佢視象時,佢用個Pat Pat向住我,又唔望我,工人姐姐話佢每晚都會喺門口等我,有時仲會喊,聽到都心痛,所以我都有同佢講,我去賺錢買嘢食、買玩具畀佢,又會叫工人姐姐播我把聲畀佢聽,等佢唔會唔記得我把聲。」
最令思明不開心的,就是當她出行期間,家中最老、年屆20歲的愛犬BB離世,她出發前都有提早為BB慶生,當時BB還很精靈:「佢太乖、太懂事嘞!好遺憾佢真係等到屋企冇晒人先靜靜咁走,佢唔想我哋難過,捱到我哋唔喺屋企佢去汪星球,自己送唔到佢最後一程,真係好難過。」