林家謙化身「林醫師」 開處男簽名會同500歌迷傾心事

20220521
東網電視
更多新聞短片
歌手林家謙今日(21日)現身灣仔一間咖啡店,為專輯《Seven》首次舉行簽名會,與約500位歌迷見面交流及簽名,他説:「一直都好想搞,好想回饋買咗碟嘅朋友,雖然隻碟出咗半年,係好好機會同樂迷交流下,其實第一隻碟出嗰陣都想搞但疫情影響搞唔到。」他表示曾與友人在此吃飯,發現食物中有合桃,令他聯想起自己歌曲《神奇的糊塗魔藥》,覺得很有緣分,於是萌生合作念頭:「樂迷都好開心,好似有個專屬嘅地方,有好多歌詞入面嘅嘢會出現,好似入咗個仙境咁。(第一次搞簽名會有冇簽到手軟?)OK喎,以前寫論文咪仲多,輕鬆嘅,因為簽名之餘仲會有時間同樂迷傾吓偈,好過好快簽完個名就走,頭先感覺大家好似嚟睇林醫師咁,幫佢哋把脈傾吓心事,哈哈!我哋有深度交流。(有咩深度交流?)今日專登邀請咗啲本身有情緒問題,聽完我嘅歌覺得釋懷咗,又或者同屋企人有問題嘅朋友,希望都畀到啲開心佢哋。」
問到現時人氣高企,會否考慮自資開咖啡店,方便與樂迷交流?他説:「未有呢個諗法,有朋友都建議出啲周邊物品,但我唔係咁生意頭腦嘅人,我嘅生意就係音樂,當然都會諗出啲得意嘅活動紀念品,等樂迷可以回憶參與嘅過程,或者會搵人合作吓,可能係Fans都唔定。」