Edan自認飲得之人 爆Jer飲醉瞓到似死咗

2022年05月21日 18:01
東網電視
更多新聞短片
MIRRO成員呂爵安(Edan)和Jer(柳應廷)出席新戲開鏡。談到12子似乎中「分手降」,接連宣布與女友分手,今日(21日)就輪到Frankie(陳瑞輝),Edan和Jer異口同聲表示:「都係喺網上知道有關消息,不過係私人事,好似佢同佢嘅前女友都話想有啲私人空間,咁我哋都冇理由幫佢回應。(最近Frankie心情點?)好少一齊嘅工作,遲啲見到佢都會慰問。」Jer亦早前與女友分手,當被問到感情現況,他即笑言:「唔回應,專心工作。(有機會會復合?)都係唔回應。」在旁的Edan即解圍:「拍劇啦,拍乜鬼嘢拖?」
Edan今次角色經常發脾氣又愛飲酒,談到難忘事,他自爆:「演醉酒戲時,我都會飲大杯威士忌幫手入戲,但可能因為基因關係,我爸爸好飲得,所以飲完都好似冇乜用。」他又爆見過Jer飲醉:「瞓到好似死咗咁。(影佢相? )好多呀,佢生日咪知囉瞓。」
Jer則表示Edan十分喜歡「爆肚」,記者笑問他是否接得上,他說:「當然接得到,反而驚佢接唔到我,不過佢個角色性格同佢本身差天共地則,事關Edan平時EQ高,我打佢都唔會發脾氣。」
又南為角色增磅
而余香凝與黃又南於戲中扮演夫婦,育有一名4、5歲女兒。又南打趣配合角色造型而增磅,認者笑指他發福,搞到他相當靦覥。談到余香凝拋下約1歲囡囡「復出」影壇,又南踢爆說:「佢第一日開工,已經話好對個女唔住。」搞到余香凝尷尬說:「第2日我投入咗已經冇事,台前幕後都好玩得。但試過大夜班,凌晨一點幾先返到屋企,我個女竟然仲喺度等我,搞到我洗手換衫就即刻氹佢瞓,然後先忙自己嘢。(囡囡見你大喊?)又冇,但我老公形容佢尖叫嘞。」
余香凝則指又南是「吹水佬」:「佢可以不停咁講個幾鐘,只係需要隔嚟有人間中應吓佢,真係好吹得。(溝女好叻?)佢溝咗我哋戲中個女囉。」又南即說:「真係搞掂咗佢,依家見親我都叫爸爸。」余香凝又指今次與前輩毛舜筠合作後,彼此一見如故,經常圍在一起分享湊女經:「佢同兩個囡囡關係都好好嘛,我又話想跟佢啲片學整麵包,希望自個女覺得我係廚神,毛姐就話我可以上去佢屋企,佢教我。」
反映香港人嘅心態
毛舜筠(毛毛)坦言接拍此片一波三折:「本來去年12月開工,但我要去探女,本來諗住1月返,結果返到嚟又遇上第5波疫情,終於拖到4月先開鏡。(諗過唔接?)冇,因為監製係我嘅好朋友,況且今次係喜劇,好反映到香港人嘅心態。」
煞科後毛毛將投入「放暑假」:「因為兩個女會返嚟,想花多啲時間陪吓佢哋,希望到時佢哋唔使隔離,事關我個大女得一個月假,如果可以嘅話仲想同佢哋去日本旅行。(可能要跟團喎。)我又唔係幾想,最好自己一家一齊。(更加珍惜天倫之樂?)係,因為都唔知下秒會發生啲咩事。」