郭柏妍心痛陳楨怡消失幕前 盼有一天4美可重聚

20220522
東網電視
更多新聞短片
2020年香港小姐季軍郭柏妍在劇集《雙生陌生人》中飾演一名律師新人,角色經常捱鬧,不過作為電視新人的她就獲好多前輩指點,深受寵愛,女神果然有着數。郭柏妍選美跑第3,但工作就跑贏同屆冠、亞軍港姐,尤其是陳楨怡被前度狙擊得體無完膚而潛水多時,郭柏妍一提陳楨怡即語塞20多秒兼眼濕濕。
郭柏妍在《雙》中飾演律師樓中的最底層,不識時務,故經常被上級黃子雄和蔣家旻責罵,觀眾睇到都感到心痛。其實鏡頭後他們是教她最多的前輩,有時蔣家旻和何廣沛收工都自願留下和她分析劇本,她表示:「覺得佢哋嘅分享好無私,夜晚開完工都好攰,佢哋都願意留低,(好錫你?)大家對我好好,好感恩,佢哋無必要提我,佢哋好善意提點,自己一定要做好啲。(覺得你好乖巧?)希望佢哋覺得我係啦,哈哈!」
多人愛錫一定有原因,本身她對演戲好認真,好像劇中其中一場跳鋼管舞的戲,事前她就下了不少功夫。除了上速成班外,練舞撞到周身瘀亦在所不計,她亦管理日常飲食,對於觀眾注意她強勁的腹肌,她亦感到喜出望外,表示:「無諗過大家有留意到(腹肌),自己都準備咗好耐,唔想身形好腫、好肥咁跳就唔好睇,所以禁食零食,但係跳鋼管舞又係幾大運動量,要食嘢至有體力,所以要得到平衡。」拍攝之前幾天,她只吃流質食物,減少飲水,拍完立即放鬆,決定好好「懲罰」自己一番。
近日,她已投入為劇集《破毒強人》開工,一劇接一劇,對此她心存感恩,亦發覺自己好鍾意做戲。其工作量亦跑贏同屆港姐。提到同屆的亞軍陳楨怡(Celina)早前遭受緋聞困擾,郭柏妍突然變得感性,表示有短訊問候對方,也收到回覆,知道她的近況不錯,表示:「希望之後大家愈來愈好,無論做嘢方面,工作、屋企和朋友方面,希望大家愈來愈好,我、Celina、Lisa(謝嘉怡)和鄺美璇,就算因為疫情或者各方面唔容易見到大家,都會保持聯絡。」不過當問到Celina何時歸隊?郭柏妍一度語塞停頓了20多秒,眼也泛起淚光,表示:「我都有特別關心佢,希望快啲同我哋一齊啦!4個一齊。」果然姊妹情深。