視愛駒如親人！米雪拉頭馬贏260萬獎金

身為馬主嘅藝人米雪今日（22日）帶埋老友李龍基現身沙田馬場，為年僅3歲嘅愛駒「蟲草成名」出賽打氣，賽前被捧成2.5倍大熱門嘅愛駒，最終順利跑第1，冇令信心十足嘅米雪失望呀！「蟲草成名」呢次就用68秒就贏得260.9萬獎金，而佢競賽生涯至今已為米雪贏得約908萬獎金，認真令人羨慕！米雪早前曾入馬房探望愛駒，同埋餵食紅蘿蔔，佢話每次同愛駒有眼神交流時，感覺就如親人一樣添！