洪永城曬到「紅都面晒」　黃翠如大讚：靚仔咗

藝人洪永城近期正忙緊為新節目《香港25個第一》進行拍攝，佢喺社交網上載自拍短片兼留言：「最新面罩，應該認唔到我，冇搽太陽油嘅後果 。」短片入面嘅佢左擰右擰，額頭同兩邊面頰畀太陽曬到「紅都面晒」，但口罩位置依舊青靚白淨，似足戴咗個紅色面罩一樣，好笑得嚟又真係睇見都覺得痛。好友黃翠如同林溥來就留言笑佢「靚仔咗」，網友就留言笑佢似蝙蝠俠，不過面罩就由黑變紅，亦有網友提醒佢要快啲搽蘆薈同做保濕滋潤一下。